tujh bin ghar kitnā suunā thā
dīvāroñ se Dar lagtā thā
bhūlī nahīñ vo shām-e-judā.ī
maiñ us roz bahut royā thā
tujh ko jaane kī jaldī thī
aur maiñ tujh ko rok rahā thā
merī āñkheñ bhī rotī thiiñ
shaam kā taarā bhī rotā thā
galiyāñ shaam se bujhī bujhī thiiñ
chāñd bhī jaldī Duub gayā thā
sannāTe meñ jaise koī
duur se āvāzeñ detā thā
yādoñ kī sīḌhī se 'nāsir'
raat ik saayā sā utrā thā