ye maiñ kahūñgā falak pe jā kar zamīñ se aayā huuñ tañg aa kar
jo ai masīhā tū hai masīhā to kuchh mire dard kī davā kar
tumhāre jalve ġhazab ke dekhe tumhāre chhīñTe balā ke paa.e
lagā lagā dī bujhā bujhā kar bujhā bujhā dī lagā lagā kar
zideñ mohabbat se aisī aa.iiñ ḳhayāl rakkhā na apne ghar kā
butoñ ne ka.abe ko muft Dhāyā kisī ke dil ko dukhā dukhā kar
vo shoḳh be-e'tibār kāfir rahā na tanhā gayā na tanhā
jo dard uTThā uThā uThā kar to dil ko baiThā biThā biThā kar
ye zor hirmān-o-yās kā hai asar kahāñ kā mirī fuġhāñ ko
paTak paTak ḳhaak par diyā hai falak se ūñchā uThā uThā kar
gudāz karte haiñ mere dil ko vo yuuñ biThāte haiñ apnā sikka
jalī kaTī ho rahī hai kyā kyā adū se mujh ko sunā sunā kar
sunī kisī ne sadā-e-tūtī na hālat-e-andalīb dekhī
jo kor thī is chaman meñ nargis to gul bhī ai ham-safīr thā kar
kahīñ na zulfoñ se khul paḌā ho mujhe hai andesha apne dil kā
ki purze purze uḌā rahā thā adū koī shai dikhā dikhā kar
vo but ki deñ us ko to na gar de to laakh tūfāñ uThā ke dhar de
zabān phir saaf qat.a kar de jo muñh se nikle ḳhudā ḳhudā kar
ilāhī hañgām-e-āmad-āmad ye kis qayāmat-ḳhirām kā hai
khisak chale sehn-e-bostāñ se tadrau-o-tā.ūs dum dabā kar
falak huā mehrbāñ phire din shab-e-visāl aa ga.ī to is ne
bahār-e-lutf-o-karam dikhā kar naqāb-e-sharm-o-hayā uThā kar
kabhī hañsāyā kabhī rulāyā kabhī rulāyā kabhī hañsāyā
jhijak jhijak kar simaT simaT kar lipaT lipaT kar dabā dabā kar
'bayāñ' hai vo bādshāh-e-asrā ki jis kī dargāh-e-ḳhusravī meñ
diyā zamīn-e-adab ko bosa falak ne gardan jhukā jhukā kar