tirī talāsh meñ jo ḳhud ko bhuul aa.e the
patā vo apnā kabhī DhūñDne na paa.e the
kise ḳhabar thī ki phūloñ meñ bhī hunar hai vahī
kis ehtiyāt se kāñToñ se bach ke aa.e the
vo be-hisī kā thā aalam zarā ḳhabar na huī
ki raushnī thī sar-e-rahguzar ki saa.e the
kināre duur bahut duur the tū majbūran
samundaroñ meñ hī logoñ ne ghar basā.e the
har ek buuñd ka.ī bijliyoñ kī hāmil thī
shadīd barkhā ne bastī ke ghar jalā.e the
ye kaise bojh chale aa.e phir se palkoñ par
ki ik zamāne par ham aaj muskurā.e the