tamām husn-e-jahāñ kā javāb ho ke rahā

jo dard dil se uThā āftāb ho ke rahā

vo bārgāh-e-junūñ hai nasīb-e-ishq-e-vafā

ye dil ye shauq nazar-bāryāb ho ke rahā

vahī safar hai vahī rasm-e-āblā-pā.ī

yaqīn-e-rāh mirā kāmyāb ho ke rahā

bahut aziiz na kyuuñ ho ki dard hai terā

ye dard baḌh ke rahā iztirāb ho ke rahā

ajiib chiiz hai ye shauq-e-ārzū-mandī

hayāt miT ke rahī dil ḳharāb ho ke rahā