yahī vafā kā sila hai to koī baat nahīñ
ye dard tum ne diyā hai to koī baat nahīñ
yahī bahut hai ki tum dekhte ho sāhil se
safīna Duub rahā hai to koī baat nahīñ
ye fikr hai kahīñ tum bhī na saath chhoḌ chalo
jahāñ ne chhoḌ diyā hai to koī baat nahīñ
tumhī ne ā.ina-e-dil mirā banāyā thā
tumhī ne toḌ diyā hai to koī baat nahīñ
kise majāl kahe koī mujh ko dīvāna
agar ye tum ne kahā hai to koī baat nahīñ