aane vaalā hai koī mehmān kyā

ho ga.e sab marhale āsān kyā

vaqt kī raftār kaise tham ga.ī

ho gayā hai har-nafas be-jān kyā

TūTnā jaḌnā to hai ik silsila

ho rahe ho is qadar hairān kyā

zindagī se rishta apnā toḌ kar

jā rahe ho jab to ye sāmān kyā

dhuup ke saa.e meñ chup sādhe hue

kar rahe ho amn kā elaan kyā

ḳhvāhishoñ ke sab parinde uḌ ga.e

ho ga.ī hai zindagī vīrān kyā

sochtā rahtā huuñ 'ādil' rāt-din

maiñ hī kyā huuñ aur mirī pahchān kyā