dil-nagar meñ bhī aa.iye sāhib
varna ā.ankhoñ se jā.iye sāhib
jī uTheñge hazār-hā manzar
sirf palkeñ uThā.iye sāhib
maiñ girā to zamāna uTThegā
baat dil meñ biThā.e sāhib
is jagah TūT-phūT rahtī hai
mere dil meñ na aa.iye sāhib
ḳhaak haiñ aap kī hathelī par
jaise chāhe uḌā.iye sāhib
maiñ na bolā to kaun bolegā
aap ḳhud hī batā.iye sāhib
ham se duniyā to ruuTh baiThī hai
aap hī maan jā.iye sāhib