har ik javāb kī tah meñ savāl aa.egā
ga.e yugoñ ke butoñ kā zavāl aa.egā
hunar kā aks bhī ho aa.ina bhī ban jaao
phir us ke ba.ad hī rañg-e-kamāl aa.egā
harīf-e-jāñ hai agar vo to phir kaho us se
ga.ī jo jaan to dil kā savāl aa.egā
yaqīn hai ki milegā uruuj ham ko bhī
yaqīn hai ki tirā bhī zavāl aa.egā
abhī ummīd ko māyūsiyoñ kā rañg na de
Thahar Thahar abhī us kā ḳhayāl aa.egā
usī ke shah pe bujhegā charāġh-e-dil 'ādil'
nihāñ ḳhulūs meñ jo ishti.āl aa.egā