dil mohabbat makān hai goyā
aarzū kā jahān hai goyā
ḳhaak meñ mil chuke ham aur is ko
aaj tak bhī gumān hai goyā
mere āzār dene ko vo shoḳh
dūsrā āsmān hai goyā
khol de muñh ḳhumoñ ke pīr-e-muġhāñ
aaj hī imtihān hai goyā
paañv aage na uTh sake vaañ se
us galī kā nishān hai goyā
terī tasvīr kyuuñ na bol uThe
is meñ āshiq kī jaan hai goyā
terā chup chup ye baiThnā 'sālik'
ik tarah kā bayān hai goyā