dil jahāñ se uThā.e baiThe haiñ

sab ko dekhe dikhā.e baiThe haiñ

chāk-e-dāman ye kah rahā hai ki ham

dil ke TukḌe uḌaa.e baiThe haiñ

vo sar-e-bazm haal kyā pūchheñ

mere matlab ko paa.e baiThe haiñ

ab ajal kyuuñ ki aa.egī dekhūñ

vo ayādat ko aa.e baiThe haiñ

karte haiñ yuuñ duā ki ham goyā

haath asar se uThā.e baiThe haiñ

agar aate haiñ vo to aane do

ham bhī āñkheñ bichhā.e baiThe haiñ

us ke dil meñ asar kar ai girya

ġhair kyā ghar banā.e baiThe haiñ

us ke va.ade ko jānte haiñ ham

shaam se zahr khaa.e baiThe haiñ

dar se vahshat-zadoñ ko ḳhud na uThā

ye koī ek jaa.e baiThe haiñ

ab to lab tak bhī aa na ai naale

ham tujhe āzmā.e baiThe haiñ

tum bhī kar jaao pā.emāl ki ham

naqsh-e-hastī miTā.e baiThe haiñ

kis ko dekh ai hazrat-e-'sālik'

aaj kuchh muñh banā.e baiThe haiñ