dil ke zaḳhm jalte haiñ dil ke zaḳhm jalne do

ham ko Thokareñ khā kar aap hī sambhalne do

raushnī fasīloñ ko toḌ kar bhī aa.egī

raat kī syāhī ko karvaTeñ badalne do

sā.ebāñ kī ḳhvāhish meñ ik safar huuñ sahrā kā

jism-o-jāñ pighalte haiñ jism-o-jāñ pighalne do

pattharoñ kī choToñ se aa.ino na ghabrāo

hādsoñ ke āñgan meñ zindagī ko palne do

ġham kī dhuup meñ jal kar rah ga.ī har ik chhāñv

ham ko apnī chāhat ke saa.e saa.e chalne do