rakh diyā hai mirī dahlīz pe patthar kis ne

aur phir bheje haiñ aaseb ke lashkar kis ne

shajar-e-tar na yahāñ barg-e-shanāsā koī

is qarīne se sajāyā hai ye manzar kis ne

kashtiyāñ kaise nikal pā.eñgī giilī tah se

pī liyā chand hī sāñsoñ meñ samundar kis ne

peshvā.ī ke liye bint-e-sabā aa.ī hai

pā-shikasta huuñ banāyā hai qad-āvar kis ne

merī bastī bhī huī sho.ala-zanī meñ shāmil

lā ke chhoḌe haiñ yahāñ aag ke paikar kis ne