Dūbnā hai us se ye iqrār kar lenā mirā
phir ba-āsānī samundar paar kar lenā mirā
kaun pūchhe mujh se merī gosha-gīrī kā sabab
kaun samjhe dar kabhī dīvār kar lenā mirā
ek ḳhushbū ban ke guzre sar se saare garm o sard
us kā chehra thāmnā aur pyaar kar lenā mirā
ban gayā logoñ kī shān-e-kaj-kulāhī kā savāl
apne sar ko lā.eq-e-dastār kar lenā mirā
'ramz' us ko de gayā ik tarz-e-fariyād-o-fuġhāñ
band āñkhoñ ko lab-e-iz.hār kar lenā mirā