navāh-e-dil meñ ye merī misāl jalte raheñ
ḳhas-o-gulāb nabāt-o-nihāl jalte raheñ
kabhī na sard paḌe garmī-e-nashāt-e-nafas
tamām paikar-e-fikr-o-ḳhayāl jalte raheñ
ye jabr-e-vaqt hai kaisā ki us kī yaad ke chāñd
ugeñ to phir sar-e-shāḳh-e-malāl jalte raheñ
havā-e-hijr abhī tak hai mahv-e-ḳhvāb kahīñ
fasīl-e-jāñ pe charāġh-e-visāl jalte raheñ
yūñhī rivāyat-e-tīr-o-kamāñ rahe raushan
nuqūsh-e-vahshat-e-pā-e-ġhazāl jalte raheñ
lage to qasr-e-shab-o-roz meñ bhī aag lage
jaleñ to sadiyoñ talak māh-o-sāl jalte raheñ
ham us kī raah meñ raushan kiye ga.e haiñ so 'ramz'
kareñ na us se koī arz-e-hāl jalte raheñ