ai āvāra yaado phir ye fursat ke lamhāt kahāñ
ham ne to sahrā meñ basar kī tum ne guzārī raat kahāñ
merī ābla-pā.ī un meñ yaad akasr kī jaatī hai
kāñToñ ne ik muddat se dekhī thī koī barsāt kahāñ
be-his dīvāroñ kā jañgal kaafī hai vahshat ke liye
ab kyuuñ ham sahrā ko jaa.eñ ab vaise hālāt kahāñ
jis ko dekho fikr-e-rafū hai jis ko dekho vo nāseh
bastī vāloñ meñ haar aa.e vahshat kī sauġhāt kahāñ