rāz-e-ulfat ayaañ na ho jaa.e
sa.ī-e-ġham rā.egāñ na ho jaa.e
nā-umīdī hai ab to vaj.h-e-sukūñ
phir koī mehrbāñ na ho jaa.e
nigah-e-lutf se na dekh hameñ
phir tamannā javāñ na ho jaa.e
ham haiñ nāzāñ vafā pe vo shākī
yuuñ koī bad-gumāñ na ho jaa.e
ham to marte haiñ ai vafā vaalo
ḳhatm ye dāstāñ na ho jaa.e
ḳhāksāroñ ko to haqīr na jaan
ye zamīñ āsmāñ na ho jaa.e
ai nasheman ko kosne vaalo
barq ḳhud āshiyāñ na ho jaa.e
tere ash.ār kī zamīn 'sahar'
ġhairat-e-āsmāñ na ho jaa.e