dil liyā hai to bevafā na bano
dard mat do agar davā na bano
yā navāzo to lutf-e-paiham se
yā kisī kā tum aasrā na bano
dil meñ hūr-o-qusūr haiñ har aan
shaiḳh uupar se pārsā na bano
ashraf-ul-ḳhalq hai laqab us kā
pahle insāñ bano ḳhudā na bano
mudda.ī kā na ho jo paas tumheñ
phir kisī dil kā mudda.ā na bano
ham vafādār haiñ raheñge bhī
na bano aap bā-vafā na bano
laaj rakh tū 'sahar' ke sajdoñ kī
but bano tum agar ḳhudā na bano