badle meñ jafāoñ ke vafā kyuuñ nahīñ dete
tum ishq ke sho.aloñ ko havā kyuuñ nahīñ dete
ma.adūm agar ho to kahāñ DhūñDhne jaa.eñ
maujūd agar ho to patā kyuuñ nahīñ dete
hairat hai ki is daur-e-kudūrat ke salātīñ
ham ahl-e-mohabbat ko sazā kyuuñ nahīñ dete
miltī hai gunāhoñ kī sazā hashr meñ lekin
nā-karda gunāhoñ kī jazā kyuuñ nahīñ dete
kab tak ai 'sahar' zabt kā āzār sahoge
jo baat hai vo us ko batā kyuuñ nahīñ dete