mohabbat meñ zabāñ ko maiñ navā-sañj-e-fuġhāñ kar luuñ
shikasta dil kī aahoñ ko harīf-e-nā-tavāñ kar luuñ
na maiñ badlā na vo badle na dil kī aarzū badlī
maiñ kyuuñ kar e'tibār-e-inqalāb-e-nā-tavāñ kar luuñ
na kar mahv-e-tamāshā ai tahayyur itnī mohlat de
maiñ un se dāstān-e-dard-e-dil ko to bayāñ kar luuñ
sabab har ek mujh se pūchhtā hai mere hone kā
ilāhī saarī duniyā ko maiñ kyuuñ kar rāz-dāñ kar luuñ