koī vazīfa mujhe bhī batā mire darvesh
tujhe huī hai faqīrī atā mire darvesh
mirī ḳhatā to bas itnī hai is ta.alluq meñ
yahī ki honī ko hone diyā mire darvesh
ise maiñ pyaar mohabbat kā naam kaise duuñ
ye aur tarah kā hai tajraba mire darvesh
ki jis ne bāñdh diyā terī zaat se mujh ko
ye ruuh kā hai koī silsila mire darvesh
har ek saañs juḌī hai tirī razā ke saath
to kyā yahī hai mukammal vafā mire darvesh
tū zindagī kā sitāra bhī isti.āra bhī
mire liye tū hai sūraj-numā mere darvesh
ye terā ishq mahaktā hai raat din mujh meñ
ki aur kuchh nahīñ mujh meñ nayā mire darvesh
ki ab vajūd se maujūd se nahīñ hai ġharaz
hai lā-vajūd kī mujh meñ sadā mire darvesh