zamīñ pe aane se sāñsoñ ke ruuTh jaane tak
ye ik safar hai musalsal qazā ke shāne tak
jo kā.enāt pe haq apnā maan baiThe the
unheñ bhī aanā paḌā āḳhirī Thikāne tak
zamīñ pe dil kī mohabbat javān hotī rahī
vafā kī dhuup pe bādal jafā ke chhāne tak
phir us ke ba.ad huā kyā mujhe nahīñ ma.alūm
maiñ hosh meñ rahī but ko ḳhudā banāne tak
sunā hai aap ināyat sabhī pe karte haiñ
kabhī to aa.eñ hamāre ġharīb-ḳhāne tak
nahīñ hai umr koī tai kisī bhī rishte kī
rahegā saath koī sirf āzmāne tak