TuuTe paḌte haiñ ye haiñ kis ke ḳharīdār tamām
sub.h se band haiñ kyuuñ misr ke bāzār tamām
ab rahā kaun jo dīdār tumhārā dekhe
parda uThte hī huī hasrat-e-dīdār tamām
ik jhalak dekh lī parde se to zālim ne kahā
luuT lī tū ne mire husn kī sarkār tamām
husn andāz adā naaz nigāheñ shoḳhī
dil mirā chhīn ke ban baiThe haiñ muḳhtār tamām
ab bhī apnā koī 'beḳhud' mujhe samjhā ki nahīñ
chhap ga.e ab to mire haal ke aḳhbār tamām