muñh pher kar vo kahte haiñ bas maan jā.iye

is sharm is lihāz ke qurbān jā.iye

bhūle nahīñ haiñ ham vo mudārāt raat kī

jī chāhtā hai phir kahīñ mehmān jā.iye

bole vo muskurā ke bahut iltijā ke ba.ad

jī to ye chāhtā hai tirī maan jā.iye

aage hai ghar raqīb kā bas saath ho chukā

ab aap kā ḳhudā hai nigahbān jā.iye

ulfat jatā ke dost ko dushman banā liyā

'beḳhud' tumhārī aql ke qurbān jā.iye