mushkil meñ mujhe us kā sahārā bhī bahut thā
vo shaḳhs mujhe jaan se pyārā bhī bahut thā
ye kam hai ki kuchh din vo mire saath rahā hai
tanhā thā to yādoñ kā sahārā bhī bahut thā
tanhā.ī udāsī ye siyah-rāt ye jal-thal
aise meñ to ik TuuTā sitāra bhī bahut thā
ik maiñ ki chalā aayā koī qadr nahīñ kī
us ne to mirā naam pukārā bhī bahut thā
kuchh merī bhī kam-fahmī thī maiñ ho gayā us kā
shīshe meñ 'ḳhalīl' us ne utārā bhī bahut thā