us kī zulfoñ meñ abhī phuul lagānā thā mujhe
aur ruḳhsār pe ik chāñd banānā thā mujhe
us ne achchhā kiyā āġhāz-e-safar meñ chhoḌā
āḳhir ik roz use chhoḌ ke jaanā thā mujhe
dostoñ ne bhī uḌāyā hai mohabbat kā mazāq
dostoñ se bhī mohabbat ko chhupānā thā mujhe
apnī barbādī kā shikva bhī karūñ to kis se
āḳhir is dil ne bhī ye din to dikhānā thā mujhe
us ne jo dil se nikālā hai kidhar jā.ūñ 'ḳhalīl'
saarī duniyā meñ yahī ek Thikānā thā mujhe