kaash maiñ tujh ko koī shaam suhānī detā
apnī nākām mohabbat kī nishānī detā
merī āñkhoñ se lahū ne bhī Tapak paḌnā thā
apne ashkoñ ko agar aur ravānī detā
tere ik baal kā sadqa bhī nahīñ thā jānāñ
tujh pe gar vaar maiñ apnī ye javānī detā
dāman-e-dil meñ duāoñ ke sivā kuchh bhī na thā
phir bhalā kaise koī chiiz nishānī detā
sūkhī Tahnī bhī harī honī thī ik roz 'ḳhalīl'
tū agar roz use ashkoñ kā paanī detā