merī dhaḌkan ho zindagī ho tum
kis liye mujh se ajnabī ho tum
vaqt kī be-shumār ghaḌiyāñ haiñ
aur mire dil meñ har ghaḌī ho tum
jis ko dekhā hai ḳhvāb meñ aksar
mujh ko lagtā hai bas vahī ho tum
tum ba-zāhir to duur rahtī ho
aisā lagtā hai paas bhī ho tum
kis liye mujh se ruuTh jaatī ho
mere āñgan kī chāñdnī ho tum
vaqt badlā to tum bhī badle ho
par mire dil meñ aaj bhī ho tum
mujh ko taḌpāo yā ki pyaar karo
haal dil kā to jāntī ho tum
pahle mujh ko gañvā diyā tum ne
ab ḳhayāloñ meñ DhūñDhtī ho tum
ab akelā nahīñ 'ḳhalīl' ke saath
yaad terī kabhī kabhī ho tum