na.e ḳhvāboñ se Dar lagne lagā hai

ye rasta pur-ḳhatar lagne lagā hai

ye kaisā daur aayā be-hisī kā

mujhe zindān ghar lagne lagā hai

bichhaḌ jā.egā tū mujh se kisī din

na lagtā thā magar lagne lagā hai

zarā dekho mirī saada tabī.at

ki qātil chāragar lagne lagā hai

safar meñ ham-safar tum kyā hue ho

safar ab muḳhtasar lagne lagā hai

'ḳhalīl' us se tumheñ nafrat thī lekin

tumheñ kyuuñ mo'atabar lagne lagā hai