tasvīr kā har rañg nazar meñ hai

kyā baat tire dast-e-hunar meñ hai

sonā sā pighaltā hai rag o pai meñ

ḳhurshīd-e-havas kāsa-e-sar meñ hai

niklā huuñ to kyā raḳht-e-safar bāñdhūñ

jo kuchh hai vo sab rāhguzar meñ hai

ik raat hai phailī huī sadiyoñ par

har lamha añdheroñ ke asar meñ hai

paanī hai sarāboñ se virāsat meñ

vo ḳhaak jo dāmān-e-nazar meñ hai

peshāni-e-ā.īna pe ho zāhir

jo zaḳhm dil-e-ā.īna-gar meñ hai

kyā mahkeñ tamannāoñ ke gul buuTe

vīrāni-e-sahrā mire ghar meñ hai