ġham kī Dhalvān tak aa.e to ḳhushī tak pahuñche
aadmī ghaaT tak aa.e to nadī tak pahuñche
ishq meñ dil ke ilāqe se guzartī hai bahār
dard ehsās tak aa.e to namī tak pahuñche
uf ye pahre haiñ ki haiñ pichhle janam ke dushman
bhañvrā gul-dān tak aa.e to kalī tak pahuñche
niiñd meñ kis tarah dekhegā sahar yaar mirā
vahm ke chhor tak aa.e to kaḌī tak pahuñche
kis ko fursat hai jo harfoñ kī harārat samjhā.e
baat āsānī tak aa.e to sabhī tak pahuñche
baiThe-baiThe kā safar sirf hai ḳhvāboñ kā futūr
jism darvāze tak aa.e to galī tak pahuñche