nahīñ rahegā hamesha ġhubār mere liye
khileñge phuul sar-e-rahguzār mere liye
kabhī to hogī kisī ko mirī kamī mahsūs
kabhī to hogā koī sogvār mere liye
taras ga.e the mire lab hañsī ko jis ke sabab
huā hai aaj vahī ashk-bār mere liye
vo mere qurb se mahrūm hī rahe shāyad
vo muntazir hai samundar ke paar mere liye
mirī talāsh meñ hogā mirā nasīb kabhī
vo vaqt lā.egā parvardigār mere liye