kuchh ab ke baras aur havāoñ kā chalan hai

bojhal hai fazā vaqt ke māthe pe shikan hai

detī haiñ dhuāñ ab bhī sulagtī huī shāmeñ

māhaul pe chhā.ī huī vaisī hī ghuTan hai

ubhrī hai phir ik Dūbte manzar kī koī yaad

sañgīt kī lai hai ki ye sūraj kī kiran hai

nikhrā hai tirā ruup mire sheroñ meñ Dhal kar

sañvrā huā merā bhī har ik naqsh-e-suḳhan hai

mahkī huī sāñsoñ meñ basī hai koī mūrat

ḳhushbu-e-badan hai ki ye ḳhushbū kā badan hai

siine se lagā lo ise palkoñ pe sajā lo

ai 'chāñd' ye biite hue lamhoñ kī chubhan hai