mere hī ās-pās ho tum bhī
in dinoñ kuchh udaas ho tum bhī
bārhā baat jiine marne kī
ek bikhrī sī aas ho tum bhī
sail-e-naġhma pe itnī hairat kyuuñ
is namī se shanās ho tum bhī
maiñ bhī Duubā huuñ āsmānoñ meñ
ḳhvāb meñ mahv-e-yās ho tum bhī
maiñ huuñ TuuTā sā paimāna
ek ḳhālī gilās ho tum bhī
gar maiñ dukh se sajā huā huuñ to
rañj se ḳhush-libās ho tum bhī
apnī fitrat kā maiñ bhī maarā huuñ
apnī aadat ke daas ho tum bhī
merī miTTī bhī ret kī sī hai
aur sahrā kī pyaas ho tum bhī