ḳhaak ho kar bhī kab miTūñgā maiñ
phuul ban kar yahīñ khilūñgā maiñ
tujh ko āvāz bhī maiñ kyuuñ dūñgā
terā rasta bhī kyuuñ takūñgā maiñ
ik purāne se zaḳhm par ab ke
koī marham nayā rakhūñgā maiñ
gher leñgī ye titliyāñ mujh ko
ḳhushbueñ jiyūñ rihā karūñgā maiñ
ḳhud se bāhar to kam nikaltā huuñ
jī meñ aayā to phir milūñgā maiñ
varna jiinā muhāl kar degā
dard ko ab ġhazal karūñgā maiñ
dhukdhukī sī lagī hai kyuuñ jī ko
itnī jaldī kahāñ marūñgā maiñ
sāñseñ detī rahīñ jo chiñgārī
ek jañgal sā jal uThūñgā maiñ
thak gayā huuñ maiñ is jazīre par
phir samundar kā ruḳh karūñgā maiñ
ruuh kā ye libās badlūñgā
bhes duujā koī dharūñgā maiñ