chīḳh kī or maiñ khiñchā jā.ūñ
ghup añdheroñ meñ Dūbtā jā.ūñ
kab se phirtā huuñ is tavaqqo.a par
ḳhud ko shāyad kahīñ maiñ pā jā.ūñ
ruuh tak bujh chukī hai muddat se
tū jo chhū le to jagmagā jā.ūñ
lamha lamha ye chhāñv ghaTtī hai
patta patta maiñ TūTtā jā.ūñ
dhuup pī kar tamām sahrā kī
abr ban kar maiñ ḳhud pe chhā jā.ūñ
dukh se kaisā bharā huā hai dil
us ko sochūñ to sochtā jā.ūñ
ek patta huuñ shāḳh se bichhḌā
jaane bah kar maiñ kis dishā jā.ūñ
jī meñ aatā hai chhoḌ duuñ ye zamīñ
āsmānoñ meñ jā samā jā.ūñ