kitne jug biit ga.e phir bhī na bhūlā jaa.e
maiñ jahāñ jā.ūñ mire saath vo chehra jaa.e
raat ab lauT chalī niiñd se jaagā jaa.e
apne kho.e hue sūraj ko pukārā jaa.e
ye damakte hue ruḳhsār chamaktī āñkheñ
zindagī kar chuke ab Duub ke dekhā jaa.e
ab ke tūfān meñ ho jaa.e na reza reza
jism kī TūTtī dīvār ko thāmā jaa.e
mohtasib shahr meñ mīzān liye phirte haiñ
ham gunahgār haiñ is shahr se bhāgā jaa.e
apne hī dil meñ kabhī jhāñk ke dekho mujh ko
maiñ koī raaz nahīñ huuñ jise samjhā jaa.e
le ke shīshe meñ chalo ātish-e-sayyāl 'shamīm'
qāzi-e-shahr ke īmān ko parkhā jaa.e