mas.ala huuñ maiñ sadā se kam-nigāhī ke liye

kaun uTThegā bhalā merī gavāhī ke liye

lauT aayā phir se vo tūfān sahrā kī taraf

shahr meñ baaqī na thā kuchh bhī tabāhī ke liye

aaj bhī maiñ terī āñkhoñ ke jazīroñ meñ panāh

DhūñDhtā phirtā huuñ apnī be-panāhī ke liye

dil ke dariyā meñ mirī yādoñ kī gahrā.ī talak

Duub ke aa.egā kaun ab ḳhair-ḳhvāhī ke liye

bolte rahne se ai 'shahzād' kuchh hāsil nahīñ

ḳhāmushī darkār hai is kaj-kulāhī ke liye