ye jo phuuT bahā hai dariyā phir nahīñ hogā

rū-e-zamīñ par manzar aisā phir nahīñ hogā

zard gulāb aur ā.īnoñ ko chāhne vaalī

aisī dhuup aur aisā saverā phir nahīñ hogā

ghāyal panchhī terī kunj meñ aan girā hai

is panchhī kā dūsrā pherā phir nahīñ hogā

maiñ ne ḳhud ko jam.a kiyā pachchīs baras meñ

ye sāmān to mujh se yakjā phir nahīñ hogā

shahzādī tire māthe par ye zaḳhm rahegā

lekin is ko chūmne vaalā phir nahīñ hogā

'sarvat' tum apne logoñ se yuuñ milte ho

jaise un logoñ se milnā phir nahīñ hogā