qindīl-e-mah-o-mehr kā aflāk pe honā

kuchh is se ziyāda hai mirā ḳhaak pe honā

har sub.h nikalnā kisī dīvār-e-tarab se

har shaam kisī manzil-e-ġhamnāk pe honā

yā ek sitāre kā guzarnā kisī dar se

yā ek piyāle kā kisī chaak pe honā

lau detī hai tasvīr nihāñ-ḳhāna-e-dil meñ

lāzim nahīñ is phuul kā poshāk pe honā

le aa.egā ik roz gul o barg bhī 'sarvat'

bārāñ kā musalsal ḳhas-o-ḳhāshāk pe honā