jab shaam huī maiñ ne qadam ghar se nikālā
Duubā huā ḳhurshīd samundar se nikālā
har-chand ki is rah meñ tahī-dast rahe ham
saudā-e-mohabbat na magar sar se nikālā
jab chāñd numūdār huā duur ufuq par
ham ne bhī parī-zād ko patthar se nikālā
dahkā thā chaman aur dam-e-sub.h kisī ne
ik aur hī mafhūm gul-e-tar se nikālā
us mard-e-shafaq-fām ne ik ism paḌhā aur
shahzādī ko dīvār ke andar se nikālā