safīna rakhtā huuñ darkār ik samundar hai
havā.eñ kahtī haiñ us paar ik samundar hai
maiñ ek lahr huuñ apne makān meñ aur phir
hujūm-e-kūcha-o-bāzār ik samundar hai
ye merā dil hai mirā ā.īna hai shahzādī
aur ā.īne meñ giraftār ik samundar hai
kahāñ vo pairahan-e-surḳh aur kahāñ vo badan
ki aks-e-māh se bedār ik samundar hai
ye intihā-e-masarrat kā shahr hai 'sarvat'
yahāñ to har dar-o-dīvār ik samundar hai