mash.hūr to bas ek diyā hai mire dil meñ
kitne hī sitāroñ kī jagah hai mire dil meñ
tum ne to hikāyāt hī sun rakkhī haiñ varna
vo shahr vo ḳheme vo sirā hai mire dil meñ
maiñ raah se bhaTkūñ to khaTaktī hai koī baat
jis tarah koī samt-numā hai mire dil meñ
duniyā se guzarne ko abhī umr paḌī hai
ye ḳhvāb to kuchh din ko rukā hai mire dil meñ
ye ghar dar-o-dīvār kī had tak hai salāmat
lekin vo jo ghar TuuT gayā hai mire dil meñ
ye log zarā der ko Tal jaa.eñ to 'bābar'
maiñ dekh luuñ kyā vaqt huā hai mire dil meñ