kyā batā.ūñ ki kis gumān meñ huuñ

mustaqil ek imtihān meñ huuñ

ābla-pā huuñ aur safar meñ huuñ

par-burīda huuñ aur uḌaan meñ huuñ

ḳhud-sarī rakh ke shāhzādī sī

kuchh kanīzoñ ke darmiyān meñ huuñ

tū ki tūfāñ mujhe samajh baiThā

ġhaur se dekh bādbān meñ huuñ

aap ne ḳhat nahīñ likhā varna

maiñ to ab bhī usī makān meñ huuñ

us kī āñkhoñ meñ Duub kar maiñ 'nishāt'

ḳhūb-sūrat se ik jahān meñ huuñ