jab mirī ziist ke unvāñ na.e matlūb hue
mere a.amāl meñ armān bhī mahsūs hue
un meñ sab apnā pata apnā nishāñ DhūñDte haiñ
jitne afsāne tire naam se mansūb hue
sab dikhāte haiñ tirā aks mirī āñkhoñ meñ
ham zamāne ko isī taur se mahbūb hue
jin ko īmān thā nazroñ kī masīhā.ī par
dil kī bastī se jo guzre baḌe mahjūb hue
qatre qatre se lahū ke ise sarsabz kiyā
aur dīvāne isī shāḳh pe maslūb hue