aaj kuchh yuuñ shab-e-tanhā.ī kā afsāna chale
raushnī sham.a se dil dard se begāna chale
shola-dar-shola kisī yaad ke chehre ubhreñ
mauj-dar-mauj habāb-e-ruḳh-e-jānāna chale
kuchh na go aañkh meñ be-dard nigāhoñ ke sivā
guftugū sāqī-e-daurāñ se harīfāna chale
vaqt jhūme kahīñ bahke kahīñ tham jaa.e kahīñ
khil uTheñ naqsh-e-qadam yuuñ koī dīvāna chale
TūTne paa.e na ye silsila-e-gardish-e-dard
dast-dar-dast chhalaktā huā paimāna chale