ik na.ī dāstāñ sunāne do

aaj kī niiñd phir gañvāne do

beḌiyāñ toḌ kar samājoñ kī

ishq meñ qaid haiñ divāne do

mere maazī ke regzāroñ meñ

ḳhat mile haiñ mujhe purāne do

aaj ro.eñge ham bhī jī bhar ke

ġham to bas ek hai bahāne do

us ko āzād kar chukī huuñ maiñ

phir bhī kahtā hai mujh ko jaane do

ek chehre se maiñ pareshāñ huuñ

ab mujhe ā.īne sajāne do

raqs kartī hai mujh meñ ḳhāmoshī

thak ga.ī hai use sulāne do