kuchh baat rah ga.ī thī batāne ke bāvajūd

huuñ hālat-e-safar meñ ghar aane ke bāvajūd

dil se utar chukā thā jo aa kar gale milā

duurī vahī thī dil se lagāne ke bāvajūd

hāthoñ meñ ab bhī us kī hai ḳhushbū basī huī

jo rah ga.ī thī haath chhuḌāne ke bāvajūd

purze vo ḳhat ke aaj bhī rakkhe haiñ mere paas

jo bach ga.e the ḳhat ko jalāne ke bāvajūd

naam us kā mere dil pe chhapā is tarah se hai

yuuñ naqsh hai abhī bhī miTāne ke bāvajūd

mujh ko bhī ye kamāl-e-hunar hai milā huā

maiñ jī rahī huuñ us ko bhulāne ke bāvajūd

koī bhī ham-shanās nahīñ ham-navā nahīñ

rishtoñ meñ ik ḳhalā hai nibhāne ke bāvajūd

terī sadā.eñ aa.iiñ jo maazī kī samt se

ham ruk ga.e haiñ paañv baḌhāne ke bāvajūd

jo zid meñ baḌh ga.e the zamīnoñ ko rauñd kar

ḳhush kyoñ nahīñ haiñ āsmāñ paane ke bāvajūd

ye kaisā intizār ki hotā nahīñ hai ḳhatm

tū aa gayā magar tire aane ke bāvajūd