ye dar ye taaq ye chaukhaT ye ghar malāl kā hai

safar meñ jitnā hai zād-e-safar malāl kā hai

maiñ kaisī sā.at-e-bad-baḳht meñ muqayyad huuñ

duā ḳhushī kī hai zāhir asar malāl kā hai

rukī huī hai hayāt ik ajab dorāhe par

idhar hañsī kā ijāra udhar malāl kā hai

sajā.e rakkhā hai ham ko anā kī suulī par

koī agar hai to bas ye hunar malāl kā hai

sambhāl rakkhā hai ab jis qadar hai sarmāya

ziyāda kuchh nahīñ bas ek ghar malāl kā hai

ravāñ huuñ maiñ usī jānib jidhar hai vo bastī

mire liye to ye saarā safar malāl kā hai

lagā.e rakkheñge siine se us ko ham ai 'tūr'

hayāt meñ koī TukḌā agar malāl kā hai