ḳhaak ho jā.eñge kirdār ye jaane maane
aur miTTī se mileñge sabhī tāne-bāne
zindagī kī to kabhī bhar na sakī almārī
pur kiye maiñ ne tamannāoñ ke saare ḳhāne
ham ye kin tund havāoñ kī zadoñ meñ aa.e
ham parinde to faqat aa.e the chugne daane
mujh ko dariyāoñ ne sahrāoñ meñ thāme rakkhā
maiñ ne dariyāoñ meñ Daale the kisī pal aane
canvas chāroñ taraf phailā huā hai 'zīshān'
par nahīñ zehn jo tasvīr ko puurā jaane