mahfil meñ to bas vo saj rahā hai
apne ko jo kuchh samajh rahā hai
dastak tire haath kī hai lekin
darvāza havā se baj rahā hai
niklā thā maiñ ghar se muñh-añdhere
ab raat kā ek baj rahā hai
phir ḳhud ko dikhā.ī de gayā huuñ
phir soch kā taar ulajh rahā hai
is daur kā hai vahī payambar
jo apne huqūq taj rahā hai
kyā ho jo kahīñ baras paḌe vo
ab tak jo faqat garaj rahā hai
itnā bhī nahīñ huuñ maiñ to 'rāshid'
jitnā mujhe vo samajh rahā hai